काठमाडौं- आर्थिक वर्ष २०८३/८४ को बजेट वक्तव्य वाचन भइरहँदा श्रमसंस्कृति पार्टीका अध्यक्ष हर्कराज राईले संसद् छाडेर बाहिरिएका छन् ।
शुक्रबार संघीय संसद्को संयुक्त बैठक हलमा अर्थमन्त्री डा. स्वर्णिम वाग्लेले बजेट भाषण गरिरहँदा हर्कराज राई उठेर हिँडेका हुन् ।
गत वैशाख २८ गते राष्ट्रपति रामचन्द्र पौडेलले सरकारको नीति तथा कार्यक्रम प्रस्तुत गर्दा काठमाडौं महानगरपालिकाका मेयर बालेन्द्र शाह (बालेन) ले बीचमै संसद् छाडेकै शैली उनले पनि अपनाए ।
बालेनले नीति तथा कार्यक्रमका बेला निस्किए पनि शुक्रबार बजेट कार्यक्रममा भने पूरै समय बसेका थिए । तर हर्कराज राईले भने बजेट भाषणकै क्रममा संसद् बंक गरेर बाहिरिए ।
संसद्बाट बाहिरिएपछि सांसद राईले आफ्नो फेसबुक पेजमा बजेट र प्रधानमन्त्री वालेन्द्र शाहलाई लक्षित गर्दै द्रुत गतिमा स्टाटस लेखे । उनको १४ लाख फलोअर भएको पेजमा पाँचवटा स्टाटस बजेट र प्रधानमन्त्रीबारे थिए ।
उनले अर्थमन्त्री डा. स्वर्णिम वाग्लेलाई लक्षित गर्दै कडा स्टाटस लेखे । ‘बहुलाएछ अर्थमन्त्री ! ‘राष्ट्रिय आवास कम्पनी लिमिटेड अन्तर्गत १०० वटा घर बनाएर बेच्ने ?’ सरकार हो कि घरजग्गा व्यापारी ?’, उनले लेखे ।
उनले अर्को स्टाटसमा युवाहरूलाई न्यूनतम तलबसहितको रोजगारी नदिने तर सरकारी कर्मचारीको तलब बढाउने कदमको उनले विरोध गरे । भने, ‘सरकारले केही नयाँ स्थापना नगर्ने तर भएका सरकारी निगम र प्राधिकरणहरूलाई नीजिकरण गरी बेच्ने अर्थमन्त्रीको नीति हामी लागू हुन दिने छैनौं । यस्तै पारा हो भने देशमा सरकारी संस्थान भन्ने केही बाँकी रहने छैन ।’
प्रधानमन्त्री वालेन्द्र शाहबारे पनि उनी चुप बस्न सकेनन्। सुरूमा लेखे, ‘खोपीको देवतालाई बाहिर निकालियो, आज अब बोल्न लाउनेछु ।’
तर बजेट भाषण चल्दै गर्दा निस्किएपछि उनले अर्को स्टाटसमा प्रधानमन्त्री संसद्मा आउनु नै मुख्य कुरा भएको तर्क गरे।
‘प्रधानमन्त्री आए, जवाफदेही बनाउने मेरो दबाब हो । त्यसैले उनैले सुनून्, उनका बजेट भाषण भनेर हिँडेँ मचाहिँ ! नीति तथा कार्यक्रम नसुनेको प्रधानमन्त्रीले बजेट भाषण सुने’, उनको अर्को स्टाटसमा लेखियो ।
संसद्मा प्रधानमन्त्री खोज्दै सबैभन्दा चर्को विरोध गर्ने श्रमसंस्कृति पार्टी हो । उसले बालेनको खोजी गर्दै पटक पटक संसद् अवरोधसँगै बहिष्कार नै गर्दै आएको छ । श्रमसंस्कृतिले मोर्चा कसेपछि अहिले सबै विपक्षी संगठित भएर बालेनको विरोध गरिरहेका छन् ।
