काठमाडौं । नेपाली कांग्रेसले आज आइतबार केन्द्रीय कार्यसमितिको बैठक बोलाएको छ। बैठक दिउँसो १ बजे सानेपास्थित पार्टी केन्द्रीय कार्यालयमा बस्नेछ।
सभापति गगन थापाका अनुसार बैठकले पछिल्लो समय पार्टीसँग सम्बन्धित महत्वपूर्ण निर्णयहरू गर्नेछ। बैठक दुईदेखि तीन दिनसम्म चल्ने उनले बताएका छन्।
‘केन्द्रीय कार्यसमिति बैठकबाटै पछिल्लो समय पार्टीका सन्दर्भमा गर्नुपर्ने निर्णय गर्ने नै छौं। दुई–तीन दिन बैठक चल्छ,’ सभापति थापाले भने, ‘बैठक लगत्तै पार्टीको महाधिवेशन प्रक्रिया अगाडि बढ्ने छ।’
संस्थापन इतर समूहले आगामी २९ साउनमा राष्ट्रिय भेला आयोजना गर्ने घोषणा गरेपछि कांग्रेसले केन्द्रीय कार्यसमिति बैठक बोलाएर पार्टीभित्र देखिएका विवादबारे छलफल गर्न लागेको हो। इतर समूहका नेताहरूले भेलाअघि पार्टी एकताका लागि नेतृत्वबाट ठोस पहल नभए नयाँ दल गठनसम्मको विकल्प अघि बढाउने चेतावनी दिँदै आएका थिए।
यद्यपि, सर्वोच्च अदालतले कांग्रेसको आधिकारिकतासम्बन्धी विवाद पुनरावलोकनको बाटो खुला गरेसँगै तत्काल पार्टी विभाजन हुने सम्भावना कमजोर बनेको छ।
प्रधानन्यायाधीश डा. मनोजकुमार शर्मासहित न्यायाधीश नित्यानन्द पाण्डेय र श्रीकान्त पौडेलको इजलासले बिहीबार कांग्रेसको विशेष महाधिवेशनसम्बन्धी विवाद पुनः सुरुदेखि सुनुवाइ गर्न आदेश दिएको थियो।
केन्द्रीय कार्यसमिति बैठकका एजेन्डा तय गर्न शनिबार कांग्रेस पदाधिकारी बैठक बसेको थियो। कांग्रेसमा केन्द्रीय कार्यसमिति बैठकअघि पदाधिकारी बैठक बसेर एजेन्डा निर्धारण गर्ने परम्परा रहँदै आएको छ।
