काठमाडौंमा आइतबारदेखि सुरु भएको नेपाली कांग्रेसको विशेष महाधिवेशनको दोस्रो दिनको बन्दसत्रले डेमोक्रेटिक लयर्स एसोसिएसन (डिएलए) का अध्यक्ष वरिष्ठ अधिवक्ता सीताराम केसीको अध्यक्षतामा पाँच सदस्यीय निर्वाचन समिति गठन गरेको छ । महामन्त्री गगनकुमार थापा र विश्वप्रकाश शर्माले प्रस्तुत गरेका दुई छुट्टाछुट्टै प्रस्तावमाथि छलफल चलिरहेका बेला केसीको नेतृत्वमा समिति गठन गरिएको हो । समितिमा अध्यक्ष केसीसँगै वरिष्ठ अधिवक्ता अशोक पोखरेल, अधिवक्ता गोकर्ण बन्जाडे, आरसी विमल पौडेल र रामचन्द्र गौतम सदस्य रहेका छन् भन्ने जानकारी कांग्रेस केन्द्रीय सदस्य प्रतिमा गौतमले दिएकी छन् । नवनियुक्त संयोजक सीताराम केसीले अब तत्काल निर्वाचन प्रक्रिया अघि बढाइने स्पष्ट पार्दै यसलाई महाधिवेशनको निर्णायक चरणतर्फको औपचारिक सुरुआतका रूपमा लिएका छन् । यसअघि निर्वाचन समितिको संयोजकको जिम्मेवारी खम्ब खातीले सम्हालिरहेका थिए ।
