काठमाडौँ, फागुन १४ नेपाली कम्युनिस्ट पार्टी (नेकपा) को केन्द्रीय निर्वाचन परिचालन समितिको महत्त्वपूर्ण बैठक आजदेखि सुरु भएको छ। पार्टीको केन्द्रीय कार्यालय पेरिसडाँडामा सुरु भएको यस बैठकले आगामी फागुन २१ गते हुने प्रतिनिधिसभा सदस्य निर्वाचनको तयारी र रणनीतिको समीक्षा गर्नेछ।
चुनावी तयारीको 'सूक्ष्म समीक्षा' पार्टीका नेता प्रमेश हमालका अनुसार, बैठक मुख्यतया निर्वाचनको वस्तुनिष्ठ तयारी र स्थानीय तहबाट प्राप्त रिपोर्टहरूमा केन्द्रित रहनेछ। "हामीले निर्वाचन परिचालन समितिको बैठक आह्वान गरेका हौँ, जहाँ निर्वाचनबारे सूक्ष्म समीक्षा हुनेछ," नेता हमालले भने। उनले स्थानीय पार्टी कमिटीहरूले पठाएको प्रतिवेदनका आधारमा देशभर नेकपाको अवस्था निकै उत्साहजनक र बलियो रहेको दाबी समेत गरे।
पत्रकार सम्मेलनको तयारी बैठकमा चुनावी अभियानका क्रममा देखिएका चुनौती, पार्टीको प्रभाव र आगामी सात दिनका लागि चालिने कदमहरूबारे छलफल हुने बुझिएको छ। बैठक सम्पन्न भएलगत्तै नेकपाले पत्रकार सम्मेलन गरी बैठकका निर्णयहरू र निर्वाचन सम्बन्धी पार्टीको आधिकारिक धारणा सार्वजनिक गर्ने तयारी गरेको छ।
फागुन २१ को निर्वाचन नजिकिँदै गर्दा राजनीतिक दलहरूले आफ्नो अन्तिम चुनावी कसरत तीव्र पारेका छन्। पेरिसडाँडामा भइरहेको यो बैठकलाई नेकपाको चुनावी परिणाम सुनिश्चित गर्ने महत्वपूर्ण खुड्किलोका रूपमा हेरिएको छ।
