तनहुँका मनराज गुरूङ, जसले नेपाली कम्युनिस्ट पार्टी (नेकपा) छाडेका थिए, भौतिक पूर्वाधारमन्त्री कुलमान घिसिङको उज्यालो नेपाल पार्टीमा आबद्ध भई गण्डकी प्रदेश संयोजकमा चयन भएका छन्। गत शनिबार भएको गण्डकी प्रदेश भेलामा सामान्य छलफल चले पनि सोमबार उनलाई औपचारिक रूपमा प्रदेश संयोजक तोकिएको हो।
गुरूङ यसअघि नेकपा माओवादी केन्द्रका गण्डकी प्रदेश कमिटी सदस्य थिए। २०६२/६३ को जनआन्दोलनपछि उनी माओवादी भ्रातृ संगठन अखिल क्रान्तिकारीमा आबद्ध भएका थिए र त्यसपछि तनहुँको तत्कालीन फिरफिरे गाविसको पार्टी कमिटी अध्यक्ष, शुक्लागण्डकी नगरपालिका कमिटी अध्यक्ष हुँदै प्रदेश कमिटी सचिव बनेका थिए। २०७४ सालको स्थानीय निर्वाचनमा शुक्लागण्डकी नगरपालिका वडा नम्बर १२ का वडाध्यक्ष निर्वाचित गुरूङले गत मंसिर १६ गते नेपाली कम्युनिस्ट पार्टी परित्याग गरेको घोषणा गरेका थिए।
उनले भने, 'माओवादी केन्द्रले मंसिरमा महाधिवेशन गरेर नेतृत्व हस्तान्तरण गर्ने निर्णय गरेको थियो। तर नेतृत्वले विभिन्न पार्टीसँग एकता गर्ने नाममा महाधिवेशन र नेतृत्व हस्तान्तरणको एजेन्डा पाखा परेपछि मैले पार्टी परित्याग गरेँ।' गुरूङले नेपाल विद्युत प्राधिकरणको कार्यकारी निर्देशक रहँदा नै कुलमान घिसिङको काम गर्ने शैली मन परेको र त्यसैले उज्यालो नेपाल पार्टीमा आबद्ध भएको बताए।
उनी भन्छन्, 'पुरानो पार्टीमा असन्तुष्टि पालेर बस्नुभन्दा नयाँ पार्टीमा आबद्ध हुनु ठिक लाग्यो। कुलमान घिसिङको काम गर्ने शैलीप्रति पहिलेदेखि झुकाव थियो। अहिले उनकै पार्टीमा जोडिए।' गुरूङका अनुसार, पार्टीको नाम कम्युनिस्ट भए मात्र उत्पीडित समुदाय र वर्गको हित हुने भन्ने कुरा अब गलत छ; जुनसुकै पार्टीमा लागे पनि उक्त वर्गको उत्थानमा लाग्न सकिन्छ। साथै, सैद्धान्तिक रूपमा कम्युनिस्ट भनिए पनि अहिलेका कम्युनिस्ट पार्टीहरू सिद्धान्तमा अडिग नभएको भन्दै अब पार्टीको नाम कम्युनिस्ट राख्न आवश्यक नरहेको बताए।
उज्यालो नेपाल पार्टीको प्रदेश संयोजक बनेसँगै गुरूङले गण्डकीका ११ जिल्ला, १८ प्रतिनिधिसभा निर्वाचन क्षेत्र र ८५ पालिकामा तदर्थ समिति गठन गर्ने अभियान सुरु गर्ने बताएका छन्। आगामी फागुन २१ गते हुने निर्वाचनको तयारीमा जुट्दै उनले जेनजी आन्दोलनको भावना अनुरूप सुशासन र विकास पुराना पार्टीबाट सम्भव नहुने बताए।
यसअघि उज्यालो नेपाल पार्टीका गण्डकी संयोजकमा केन्द्रीय सदस्य कुशल गुरूङ तोकिएका थिए। गण्डकी भेलामार्फत मनराज गुरूङलाई प्रदेश संयोजक तोकेर जिल्ला र पालिकासम्म पार्टीको संगठन विस्तार गर्न लागिएको पार्टीले जनाएको छ।
