११ माघ, काठमाडौं । नेकपा एमालेले आगामी निर्वाचनमा बहुमत हासिल गर्ने लक्ष्यसहित आफ्ना पार्टी सदस्यहरूलाई सक्रिय रूपमा चुनावी अभियानमा होमिन आह्वान गर्दै अध्यक्ष केपी शर्मा ओलीको हस्ताक्षरसहितको अपिल पत्र पठाएको छ । पत्रमा देश निर्माणका लागि पार्टीलाई बहुमत आवश्यक रहेको उल्लेख गर्दै त्यसका लागि उम्मेदवारहरूको विजय सुनिश्चित गर्न सबै कमरेडहरूले उच्च मनोबलका साथ क्रियाशील भूमिका निर्वाह गर्नुपर्ने आग्रह गरिएको छ । ‘देश निर्माणका लागि हाम्रो पार्टीलाई बहुमत आवश्यक छ, त्यसैले बहुमतका लागि अपरिहार्य पार्टीका उम्मेदवारहरूको विजय सुनिश्चित गर्न कमरेडहरूको सक्रिय सहयोगको अपेक्षा गर्दछु,’ अपिलमा भनिएको छ । नेताहरूका अनुसार यस्तो अपिलसहितको पत्र पार्टीका ६ लाख ६३ हजार सदस्यलाई पठाइएको हो । प्रचार विभाग संयोजक मीनबहादुर शाहीले यो अपिल केवल पार्टी सदस्यहरूका लागि मात्र नभई आम मतदातालाई पनि सन्देश दिने उद्देश्यले गरिएको बताए, जसले एमालेले चुनावी माहोललाई थप सशक्त बनाउँदै बहुमतको लक्ष्यतर्फ संगठित ढंगले अघि बढ्न खोजिरहेको संकेत गर्दछ ।
