काठमाडौं । नेपाली कांग्रेसका नेता डा. शेखर कोइरालाले पार्टीभित्र देखिएको विभाजन अन्त्य गर्दै कांग्रेसलाई एकढिक्का बनाउन आफूहरू सफल हुने विश्वास व्यक्त गरेका छन्।
शुक्रबारदेखि सुरु भएको इतर पक्षको राष्ट्रिय भेलालाई सम्बोधन गर्दै कोइरालाले कांग्रेस अहिले विभाजित मानसिकताबाट गुज्रिरहेको भए पनि पार्टीलाई एकताबद्ध बनाउने बताए। उनले भने, “नेपाली कांग्रेस हामी मिलाउँछौं, मिल्छौं। मलाई विश्वास छ, नेपाली कांग्रेस एकढिक्का हुन्छ।”
देशको हितका लागि कांग्रेस एकताबद्ध हुनु आवश्यक रहेको उनको भनाइ थियो।
कोइरालाले नेपाली कांग्रेसले इतिहासदेखि नै सबै पक्षलाई समेटेर अघि बढ्दै आएको उल्लेख गर्दै पार्टीमा कसैको निरंकुशता स्वीकार्य नहुने स्पष्ट पारे। “नेपाली कांग्रेसमात्रै यस्तो पार्टी हो, जसले सधैं सबैलाई मिलाएर अघि बढेको छ। हामी कसैको निरंकुशता स्वीकार गर्दैनौं,” उनले भने।
