बीबीसी । अमेरिकी राष्ट्रपति डोनाल्ड ट्रम्पले ह्वाइट हाउसकी प्रेस सेक्रेटरी करोलिन लेभिटले यही महिनाको अन्त्यमा पद छाड्ने घोषणा गरेका छन् ।
ट्रम्पले सामाजिक सञ्जालमार्फत लेभिट आफ्ना ‘सबैभन्दा विश्वासिला सहयोगीमध्ये एक’ रहेको उल्लेख गर्दै साना छोराछोरी र परिवारसँग समय बिताउन उनले पदबाट अलग हुने बताएका हुन् ।
‘यो निर्णयलाई म पूर्ण रूपमा बुझ्छु र सम्मान गर्छु,’ ट्रम्पले लेखेका छन्। उनले लेभिट अब आफ्ना प्रमुख बाह्य सल्लाहकारमध्ये एकका रूपमा रहने र रिपब्लिकन पार्टीभित्र प्रभावशाली आवाज बन्ने बताएका छन्।
लेभिटले गत वर्ष ह्वाइट हाउस प्रेस सेक्रेटरीको जिम्मेवारी सम्हालेकी थिइन्। उनी उक्त पद सम्हाल्ने सबैभन्दा कम उमेरकी व्यक्ति बनेकी थिइन्। उनको स्थानमा कसलाई नियुक्त गरिने भन्नेबारे तत्काल कुनै जानकारी सार्वजनिक गरिएको छैन।
लेभिटले गत मेमा पति निकोलस रिसिओसँग दोस्रो सन्तानका रूपमा छोरीलाई जन्म दिएकी थिइन्। उनका दुई वर्षका छोरा पनि छन्। उनी गत महिना मातृत्व बिदापछि काममा फर्किएकी थिइन्।
ट्रम्पको घोषणापछि एक्समार्फत प्रतिक्रिया दिँदै लेभिटले ह्वाइट हाउस प्रेस सेक्रेटरीको जिम्मेवारीलाई आफ्नो जीवनकै ‘सबैभन्दा ठूलो सम्मान र साहसिक यात्रा’ भएको बताएकी छन् ।
उनले दुई साना छोराछोरीकी आमा भएर विश्वकै सबैभन्दा चुनौतीपूर्णमध्ये एक जिम्मेवारी सम्हाल्नु आफ्नो जीवनको सबैभन्दा सुखद तर चुनौतीपूर्ण समय भएको उल्लेख गरेकी छन्।
छोरी जन्मिएपछि ह्वाइट हाउस फर्किएयता आफूले छोराछोरीले पाउनुपर्ने समय र ध्यान दिन नसकेको महसुस गरेको भन्दै उनले परिवारलाई प्राथमिकता दिन पद छाड्ने निर्णय गरेको बताएकी छन्।
