काठमाडौं । आइसिसी विश्वकप क्रिकेट लिग–२ को जारी चक्रमा नेपालको कमजोर प्रदर्शनपछि नेपाल क्रिकेट संघ (क्यान)ले गरेको कप्तान परिवर्तनको निर्णय पछिल्ला खेलको नतिजाले सही दिशामा गएको देखाउन थालेको छ। क्यानले गत साउनमा रोहितकुमार पौडेललाई कप्तानीबाट हटाउँदै सन्दीप लामिछानेलाई एकदिवसीय टोलीको नेतृत्व सुम्पिएको थियो।
अन्तर्राष्ट्रिय क्रिकेटमा निरन्तरको प्रदर्शन र विभिन्न चर्चित विदेशी व्यावसायिक लिगको अनुभवका कारण सन्दीपलाई पुनः कप्तानीको जिम्मेवारी दिइएको थियो। क्यानले कप्तान परिवर्तनसँगै एकदिवसीय टोलीमा केही खेलाडीसमेत हेरफेर गरेको थियो।
कप्तानी सम्हालेपछि सन्दीपसामु पहिलो ठूलो चुनौती एसिसी एसिया कपमा छनोट हुने थियो। नयाँ र पुराना खेलाडी सम्मिलित टोलीको व्यवस्थापन गर्नुपर्ने चुनौतीबीच उनले कप्तान र खेलाडीका रूपमा प्रभावशाली प्रदर्शन गरे।
सन्दीपको नेतृत्वमा नेपालले एसिसी प्रिमियर कप २०२६ मा ६ खेल खेल्दा पाँचमा जित र एकमा हार बेहो¥यो। समूह विजेताका रूपमा सेमिफाइनल पुगेको नेपालले त्यहाँ पनि उत्कृष्ट प्रदर्शन गर्दै फाइनलमा स्थान बनायो।
फाइनलमा नेपालले संयुक्त अरब इमिरेट्स (युएई)लाई ४४ रनले पराजित गर्दै उपाधि जित्नुका साथै दोस्रोपटक एसिया कपमा स्थान सुरक्षित गर्यो। नेपालको सफलतामा कप्तान लामिछानेको बलिङ प्रदर्शन महत्वपूर्ण रह्यो। उनले प्रतियोगिताका ६ खेलमा २.९८ को इकोनोमी रेटमा सर्वाधिक १७ विकेट लिए।
उत्कृष्ट प्रदर्शन गरेका सन्दीप प्रतियोगिताकै ‘सर्वोत्कृष्ट खेलाडी’ घोषित भए। एकदिवसीय ढाँचाको एसिसी प्रिमियर कपमा उनी लगातार दोस्रोपटक यो अवार्ड जित्न सफल भएका हुन्। यसअघि उनले सन् २०२३ को संस्करणमा पनि ‘सर्वोत्कृष्ट खेलाडी’को अवार्ड पाएका थिए।
राष्ट्रिय क्रिकेट टोलीका पूर्वखेलाडी दीपेन्द्र चौधरीले सन्दीपले व्यक्तिगत प्रदर्शनसँगै कप्तानको जिम्मेवारी पनि प्रभावकारी रूपमा निर्वाह गरेको बताए।
‘एसिसी प्रिमियर कपमा नेपालको नतिजाले कप्तानका रूपमा सन्दीप सफल देखिएको प्रमाण दिएको छ। उनले जुन प्रकारले टोलीको नेतृत्व गरिरहेका छन्, त्यसले अन्य खेलाडीलाई पनि मद्दत पुगेको छ,’ चौधरीले भने, ‘प्रतियोगितामा उनले बलरको सही सदुपयोग गरे। धेरै नयाँ खेलाडी भए पनि उनको कप्तानी उत्कृष्ट रह्यो।’
क्यानको खेलाडी छनोट समितिका पूर्वसंयोजकसमेत रहेका चौधरीले उपाधि जित्न अन्य खेलाडीको प्रदर्शन पनि उत्तिकै महत्वपूर्ण रहेको बताए। टोली एकढिक्का भएर खेल्दा र दबाबका अवस्थामा खेलाडीले धैर्य कायम राख्दा सकारात्मक नतिजा आएको उनको भनाइ छ।
‘सन्दीपको उत्कृष्ट कप्तानी रह्यो नै, तर टोलीको सफलतामा अन्य खेलाडीको प्रदर्शनलाई पनि नजरअन्दाज गर्न मिल्दैन। बसिर अहमद, करण केसी, गुलशन झा, आसिफ शेख, अर्जुन कुमाललगायत खेलाडीको प्रदर्शन पनि उपाधि जित्न महत्वपूर्ण रह्यो,’ उनले भने।
अब सन्दीपसामु आइसिसी विश्वकप लिग–२ को अन्तिम शृङ्खलामा राम्रो नतिजा निकाल्ने चुनौती छ। नेपाली टोली एकदिवसीय मान्यता जोगाउन तालिकाको शीर्ष ६ भित्र पर्नुपर्ने दबाबमा छ।
चौधरीका अनुसार नेपालले लिग–२ को अन्तिम शृङ्खलामा ओमान र क्यानडासँग खेल्नेछ। एसिसी प्रिमियर कपको सफलताले नेपाली टोलीको आत्मविश्वास बढेकाले त्यसको फाइदा लिग–२ मा उठाउन सकिने उनको भनाइ छ।
हाल नेपाल लिग–२ को तालिकामा सातौँ स्थानमा छ। ३२ खेल खेलेको नेपालले ११ खेलमा जित, १९ मा हार तथा दुई खेलमा अंक बाँडेको छ। एकदिवसीय मान्यता कायम राख्न शीर्ष ६ मा पुग्नुपर्ने भएकाले नेपालले बाँकी खेलमा महत्वपूर्ण जित निकाल्नुपर्ने अवस्था छ।
नेपालले लिग–२ को अन्तिम शृङ्खला आगामी अक्टोबरमा खेल्ने तालिका छ।
