झापा । मेचीनगर नगरपालिका–३ तेलपानीस्थित धानबारीमा बुधबार बिहान जङ्गली हात्ती मृत फेला परेको छ।
स्थानीयवासीले धानखेतमा वयस्क दाह्रे हात्ती मृत अवस्थामा देखेपछि डिभिजन वन कार्यालयलाई खबर गरेका थिए। घटनाको जानकारी पाएपछि वन कार्यालयले घटनास्थलमा टोली पठाएको कार्यालय प्रमुख नथुनी गोहीवार यादवले जानकारी दिए।
उनका अनुसार हात्तीको मृत्युको कारण अहिलेसम्म खुल्न सकेको छैन। घटनास्थलको निरीक्षण तथा आवश्यक परीक्षणपछि मृत्युको कारण पत्ता लाग्ने जनाइएको छ।
मेचीनगरका वडा नं. २, ३, ४ र ५ मा लामो समयदेखि जङ्गली हात्तीको आवतजावत हुँदै आएको छ। हात्तीका कारण स्थानीयवासी तथा किसानको जनधन र खेतीबालीमा क्षति हुँदै आएको छ।
मेची नदी पार गरेर भारतीय जङ्गलबाट ठूलो सङ्ख्यामा जङ्गली हात्ती झापा आउने गरेका छन्। पछिल्ला वर्षमा स्थानीय जङ्गलमा बसोबास गर्ने रैथाने हात्तीको सङ्ख्यासमेत बढ्दै गएको वन कार्यालयले जनाएको छ।
डिभिजन वन कार्यालयको तथ्याङ्कअनुसार झापाका विभिन्न क्षेत्रमा पछिल्लो १६ वर्षमा २८ वटा जङ्गली हात्ती मृत अवस्थामा फेला परेका छन्।
