हेटौँडा । बागमती प्रदेशका नवनियुक्त मुख्यमन्त्री किरण थापा मगरले पद तथा गोपनीयताको शपथ ग्रहण गरेका छन्।
प्रदेश प्रमुख दीपकप्रसाद देवकोटाले बिहीबार थापालाई नेपालको संविधानको धारा १६८ को उपधारा (२) बमोजिम मुख्यमन्त्री पदको शपथ गराएका हुन्।
थापाले नेकपा एमाले, नेपाली कम्युनिस्ट पार्टी (नेकपा) र राष्ट्रिय प्रजातन्त्र पार्टी (राप्रपा) का ६३ प्रदेशसभा सदस्यको समर्थनमा मुख्यमन्त्रीमा दाबी पेस गरेका थिए।
यद्यपि, राप्रपाको समर्थनलाई लिएर पार्टीभित्र विवाद देखिएको छ। पार्टीको निर्णयविपरीत सरकार गठन प्रक्रियामा सहभागी भएको भन्दै राप्रपा केन्द्रले बागमती प्रदेश संसदीय दलका नेता उद्धव थापालाई साधारण सदस्य र सांसद पदसमेत नरहने गरी कारबाही गरेको छ।
किरण थापा मगर बागमती प्रदेशका सातौँ मुख्यमन्त्री बनेका छन्।
४ भदौ २०८३, बिहिबार ०६:२९ मा प्रकाशित
