काठमाडौँ – राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टीका सांसदहरूलाई अनुशासन उल्लंघन गरे फिर्ता बोलाइने चेतावनी दिएका छन्।
उक्त चेतावनी उनले पार्टीका सांसदहरूको अभिमुखीकरण कार्यक्रममा समापन मन्तव्य दिँदै व्यक्त गरेका हुन्। लामिछानेले सांसदहरूले पार्टी अनुशासन पालना गर्नुपर्नेमा जोड दिँदै, पार्टी ठूलो र सरकार सञ्चालनमा रहेको अवस्थामा प्रत्येक सांसदले जिम्मेवारीपूर्वक व्यवहार गर्न आवश्यक रहेको बताए।
रास्वपाको विधानको दफा ६९ अनुसार जनप्रतिनिधिलाई फिर्ता बोलाउने अधिकार सभापतिलाई रहेको छ। लामिछानेले सांसदहरूको व्यक्तिगत स्वतन्त्रता सम्माननीय रहने तर पार्टी अनुशासन कायम रहनै पर्ने स्पष्ट पारे। उनले स्वतन्त्रता र अनुशासनबीचको सन्तुलन भंग नहुने पनि जोड दिए।
सभापतिले आगामी दिनमा पार्टीभित्र अनुशासन कडाइका साथ लागू गरिने र सांसदहरूले त्यसका मापदण्ड पालना गर्नुपर्ने जानकारी गराएका छन्।
