‘सर्वोच्चको आदेशको सम्मान गर्छौं, विशेष महाधिवेशन अझ आवश्यक’

काठमाडौं । नेपाली कांग्रेसका सभापति गगनकुमार थापाले कांग्रेसको आधिकारिकतासम्बन्धी विवादमा सर्वोच्च अदालतले दिएको पछिल्लो आदेशलाई सम्मान गर्ने बताएका छन्। उनले विशेष महाधिवेशनबाट भएका निर्णयहरू कानुनी रूपमा वैधानिक रहेको र त्यसको पुष्टि सर्वोच्च अदालतबाट पुनः हुने विश्वास व्यक्त गरे।

शुक्रबार काठमाडौंमा आयोजित नेपाल लोकतन्त्रवादी आदिवासी जनजाति महासंघको दोस्रो राष्ट्रिय सम्मेलनको उद्घाटन समारोहलाई सम्बोधन गर्दै थापाले सर्वोच्चको आदेशपछि स्वाभाविक रूपमा केही प्रश्न उठे पनि कांग्रेस अदालतको प्रक्रियाप्रति पूर्ण सम्मानका साथ अघि बढ्ने स्पष्ट पारे।

‘हिजो सर्वोच्च अदालतबाट कांग्रेसको आधिकारिकता विवादमा एउटा आदेश आएको छ। त्यसबाट स्वाभाविक रूपमा केही प्रश्न उठेका छन्। हाम्रो स्पष्ट धारणा के हो भने हामी उक्त निर्णयलाई सम्मान गर्छौं,’ उनले भने।

थापाले कांग्रेसको विधानअनुसार सार्वभौम महाधिवेशन प्रतिनिधिको बहुमत उपस्थितिमा विशेष महाधिवेशन सम्पन्न भएको र त्यसको वैधानिकता निर्वाचन आयोगले स्वीकार गरिसकेको बताए। सर्वोच्च अदालतले पनि त्यसलाई स्वीकार गरिसकेको उल्लेख गर्दै उनले आवश्यक परे पुनः पुष्ट्याइँ हुने प्रक्रियालाई पनि सकारात्मक रूपमा लिने धारणा राखे।

‘विशेष महाधिवेशनको वैधानिक मान्यता निर्वाचन आयोगले दिइसकेको छ। त्यसलाई सर्वोच्च अदालतले पनि स्वीकार गरिसकेको छ। अब फेरि पुष्ट्याइँ गर्नुपर्ने भनेको छ भने त्यसलाई पनि हामी सम्मान गर्छौं,’ उनले भने।

सभापति थापाले पार्टी नेतृत्वमा रहँदा आफ्नो जिम्मेवारीप्रति सदैव सचेत रहेको उल्लेख गर्दै कांग्रेसलाई एकताबद्ध बनाउने प्रयास निरन्तर जारी रहने बताए। विशेष महाधिवेशनमा सहभागी हुन नसकेका नेता–कार्यकर्तालाई समेत आगामी पन्ध्रौं महाधिवेशनसम्म पार्टीको मूलधारमा समेट्ने प्रयास भइरहेको उनले जानकारी दिए।