काठमाडौं । अर्थ मन्त्रालयले आर्थिक वर्ष २०८३/८४ का लागि साउन १ गतेदेखि लागू हुने सरकारी कर्मचारीको नयाँ तलबमान सार्वजनिक गरेको छ।
साउन ६ गते बसेको मन्त्रिपरिषद् बैठकले तलबमान, ग्रेड, प्राविधिक ग्रेड तथा १० प्रतिशत प्रोत्साहन भत्तासम्बन्धी निर्णय गरेको थियो। सरकारले जेठ १५ गते सार्वजनिक गरेको बजेटमार्फत सरकारी कर्मचारीको तलबमा १० प्रतिशत वृद्धि र १० प्रतिशत मासिक प्रोत्साहन भत्ता उपलब्ध गराउने घोषणा गरेको थियो। सोही निर्णय कार्यान्वयन गर्दै मन्त्रालयले बुधबार सम्बन्धित सरकारी निकायलाई नयाँ तलबमानबारे परिपत्र गरेको हो।
नयाँ व्यवस्था अनुसार निजामती कर्मचारी, नेपाली सेना, नेपाल प्रहरी, सशस्त्र प्रहरी बल, स्वास्थ्य सेवा, संसद सेवा, सामुदायिक विद्यालयका शिक्षक तथा प्रदेश र स्थानीय तहका कर्मचारीले (निवृत्तभरण प्रयोजनका लागि) अनुसूची १ देखि ८ सम्मका नयाँ तलबमान, एक दिनको तलब बराबरको ग्रेड रकम र वृद्धि भएको तलबमानको १० प्रतिशत मासिक प्रोत्साहन भत्ता पाउनेछन्।
मन्त्रालयले निर्धारण गरेको प्रारम्भिक तलबमानअनुसार मुख्य सचिवको तलब रु ८४ हजार ९३२, राजपत्राङ्कित विशिष्ट श्रेणीको रु ७९ हजार २९०, अतिरिक्त सचिव (पेन्सन प्रयोजन)को रु ६६ हजार ५३९, राजपत्राङ्कित प्रथम श्रेणीको रु ६२ हजार ४६६, द्वितीय श्रेणीको रु ५३ हजार ६११ र तृतीय श्रेणीको रु ४८ हजार ५८ कायम गरिएको छ।
यस्तै, राजपत्र अनङ्कित प्रथम अतिरिक्त मान (पेन्सन प्रयोजन)को रु ४१ हजार ५१७, राजपत्र अनङ्कित प्रथमको रु ३८ हजार २०३, राजपत्र अनङ्कित द्वितीय अतिरिक्त मान (पेन्सन प्रयोजन)को रु ३७ हजार ४०७, राजपत्र अनङ्कित द्वितीयको रु ३६ हजार १९२, राजपत्र अनङ्कित तृतीयको रु ३० हजार ३७३ तथा राजपत्र अनङ्कित चतुर्थको रु २८ हजार ६९० प्रारम्भिक तलबमान निर्धारण गरिएको मन्त्रालयले जनाएको छ।
