धनगढी । सुदूरपश्चिम प्रदेशका मुख्यमन्त्री कमलबहादुर शाहले पदबाट राजीनामा दिएका छन्।
बिहीबार साँझ बसेको प्रदेशसभा बैठकलाई सम्बोधन गर्दै शाहले राजीनामाको घोषणा गरेका हुन्। प्रदेशसभामा सम्बोधन गरेपछि उनले प्रदेश प्रमुखसमक्ष राजीनामा बुझाएका छन्।
प्रदेशसभाबाट विश्वासको मत पाउने अवस्था नदेखिएपछि शाहले राजीनामा दिएका हुन्। गत असार ३१ गते नेकपा एमालेले सरकारलाई दिएको समर्थन फिर्ता लिएपछि शाह नेतृत्वको सरकार अल्पमतमा परेको थियो। संविधानअनुसार विश्वासको मत लिनुपर्ने ३० दिनको समयसीमा बिहीबार पूरा भएको छ।
निर्धारित समयअनुसार साँझ ५ बजे बस्ने भनिएको प्रदेशसभा बैठक केही ढिलाइपछि सुरु भएको थियो। बैठकलाई सम्बोधन गर्दै शाहले आफूलाई दिइएको जिम्मेवारीअनुसार सरकार सञ्चालन गरेको दाबी गरे। अधिकार नदिने काम आफूले गर्न नसक्ने उल्लेख गर्दै उनले आफ्नो नेतृत्वमा प्रदेश सरकारले गरेका कामबारे धारणा राखे।
शाहको राजीनामासँगै सुदूरपश्चिममा नयाँ सरकार गठनको प्रक्रिया अघि बढ्ने भएको छ। नयाँ सरकार गठनका लागि नेकपा र नेकपा एमालेबीच सहमति भइसकेको बताइएको छ। सहमतिअनुसार नेकपाको नेतृत्वमा नयाँ सरकार गठन गर्ने तयारी छ।
