काठमाडौंमा जारी नेपाली कांग्रेसको विशेष महाधिवेशन नयाँ नेतृत्व चयनतर्फ अघि बढिसकेको छ। मतदाताको नामावली सार्वजनिक भइसकेको छ भने निर्वाचन समितिले नयाँ नेतृत्व चयनका लागि कार्यतालिका समेत सार्वजनिक गरेको छ। सोही सन्दर्भमा पार्टीका सभापति शेरबहादुर देउवाको नाम पहिलो नम्बरमा सार्वजनिक भएको छ भने राष्ट्रपति रामचन्द्र पौडेलको नाम केन्द्रीय कार्यसमितिका पदाधिकारी तथा सदस्यहरूमा दोस्रो नम्बरमा आएको छ। सूचीमा उनी ‘नेता’ भनेर उल्लेख गरिएको छ।
महाधिवेशनमा अहिलेसम्म ४,५०० बढी मतदाताले मतदान गरेका छन्। संविधानको धारा ६१ (३) अनुसार राष्ट्रपतिले राष्ट्रिय एकताको प्रवर्धन गर्नुपर्छ र दलको सदस्यता त्यागेको हुनुपर्ने प्रचलन छ। राष्ट्रपति पौडेल २०७९ फागुन २५ मा निर्वाचित भएका थिए र २८ फागुनमा कांग्रेस केन्द्रीय कार्यालयलाई पत्राचार गरेर आफू राष्ट्रपतिमा निर्वाचित भएकाले पार्टी सदस्यता त्यागेको जानकारी गराएका थिए।
