बाजुरा । गौमुल गाउँपालिका–३ कटीगाउँमा पहिरोले दुई घर पूर्ण रूपमा क्षतिग्रस्त भएपछि उच्च जोखिममा रहेका १४ घरका ११५ जनालाई सुरक्षित स्थानमा स्थानान्तरण गरिएको छ।
बिहीबार दिउँसो अविरल वर्षासँगै आएको पहिरोले स्थानीय ५७ वर्षीय पूर्णिमल बोहरा र ३८ वर्षीया बुदी बोहराको तीनतले घर पूर्ण रूपमा पुरिएको जिल्ला प्रहरी कार्यालय बाजुराले जनाएको छ। पहिरोमा घरभित्र रहेका सामानसमेत पुरिएका छन्।
जिल्ला प्रहरी कार्यालय बाजुराका प्रवक्ता नरेशबहादुर शाहीका अनुसार पहिरोको जोखिम कायमै रहेकाले आसपासका १४ घरका ११५ जनालाई सुरक्षित स्थानमा सारिएको हो। विस्थापित परिवारलाई हाल अस्थायी टहरामा राखिएको छ।
पहिरोले पुरिएका घर तथा सामग्री निकाल्ने प्रयास भइरहेको प्रहरीले जनाएको छ। लगातार वर्षा भइरहेकाले थप पहिरो जान सक्ने सम्भावना रहेको भन्दै स्थानीयवासीलाई सतर्क रहन आग्रह गरिएको छ।
यसैबीच, गौमुल गाउँपालिका अध्यक्ष हरिबहादुर रोकायाले प्रभावित परिवारलाई राहत सामग्री उपलब्ध गराउन गाउँपालिकाले टोली परिचालन गरेको जानकारी दिए। उनले विस्थापित परिवारको सहयोगका लागि स्थानीय सामाजिक सङ्घसंस्थालाई समेत आवश्यक सहयोग गर्न आग्रह गरेका छन्।
