काठमाडौं । पूर्वप्रधानमन्त्री तथा नेकपाका संयोजक पुष्पकमल दाहाल ‘प्रचण्ड’ ले जेन-जी आन्दोलनको समयमा आफू र माधव नेपालले सहजीकरण नगरे देश ठूलो राजनीतिक संकटमा पर्ने अवस्था आएको बताएका छन्। बागलुङको बुर्तिबाङमा कार्यकर्तासँगको जनसंवादमा प्रचण्डले तत्कालीन अन्तरिम सरकार र निर्वाचन नै विकल्पको रूपमा देखिएको र त्यसैअनुसार उनीहरूले सहजीकरण गरेको बताए। उनले भने, “सतही रूपमा हेर्दा जेन-जी आन्दोलन जलाउने र लुट्ने मात्र देखिन्थ्यो, तर भित्रभित्र संविधान नै खारेज गराएर कठपुतली सरकार बनाइ देशलाई युक्रेनजस्तो बनाउने योजना चलाइएको हामीले थाहा पायौँ। त्यसबेला समाधानका रूपमा अन्तरिम सरकार र निर्वाचनको विकल्प मात्र देखिन्थ्यो। म र माधव नेपालले सहजीकरण गर्यौँ। यदि हामीले विवेक प्रयोग नगरेको भए, त्यो ठूलो दुर्घटना हुन सक्थ्यो।”
प्रचण्डले संविधान र राष्ट्रपति संस्थालाई बचाउन सफल भए पनि केही व्यक्तिहरू प्रभावित भएको बताए। प्रारम्भमा देश चुनावतर्फ जाने कि नजाने भन्ने शंका भए पनि अहिले पूरा मुलुक र जनता चुनावतर्फ लागिसकेको दाहालले बताए। उनले थपे, “कतिपयले सर्वपक्षीय सरकार र संसद पुनःस्थापनाको कुरा गरिरहेका थिए, तर हामी मात्र जनतामा जाने विकल्प हो भन्नमा अडिग थियौँ। आज हामी खुसी छौँ कि सबै राजनीतिक दलहरू आम जनतालाई चुनावतर्फ लैजान तयार भएका छन्।”
