दोलखा । प्रसिद्ध धार्मिक तथा पर्यटकीय गन्तव्य कालिन्चोकमा आन्तरिक तथा बाह्य पर्यटकको आकर्षण बढ्दै जाँदा त्यहाँ सञ्चालित कालिन्चोक दर्शन लिमिटेडको वित्तीय अवस्था उल्लेख्य रूपमा सुदृढ बनेको छ। कम्पनीले सार्वजनिक गरेको आर्थिक वर्ष २०८२/८३ को चौथो त्रैमाससम्मको अपरिष्कृत वित्तीय विवरणअनुसार आम्दानी, खुद नाफा र प्रतिशेयर आम्दानीमा उल्लेखनीय सुधार देखिएको हो।
समीक्षा अवधिमा कम्पनीले केबुलकार तथा यससँग सम्बन्धित सेवाबाट ८ करोड ५९ लाख ४० हजार रुपैयाँ आम्दानी गरेको छ। यो अघिल्लो आर्थिक वर्षको सोही अवधिको ७ करोड ६३ लाख ६१ हजार रुपैयाँको तुलनामा १२.५५ प्रतिशत बढी हो। धार्मिक तथा पर्यटकीय गतिविधि विस्तारसँगै कालिन्चोक पुग्ने पर्यटकको संख्या बढ्दा कम्पनीको मुख्य व्यवसायमा सकारात्मक प्रभाव परेको देखिन्छ।
कम्पनीको खुद नाफामा भने सबैभन्दा ठूलो सुधार देखिएको छ। गत वर्षको २ करोड ८१ लाख २० हजार रुपैयाँ खुद नाफा १०५.१४ प्रतिशतले बढेर ५ करोड ७६ लाख ८४ हजार रुपैयाँ पुगेको छ। यसले कम्पनीले एक वर्षमै दोब्बरभन्दा बढी नाफा कमाउन सफल भएको संकेत गर्छ।
यद्यपि सञ्चालन नाफा केही घटेको छ। अघिल्लो वर्ष ३ करोड ७३ लाख ९ हजार रुपैयाँ रहेको सञ्चालन नाफा यस वर्ष ३ करोड १६ लाख ३ हजार रुपैयाँमा सीमित भएको छ। तर, मुख्य व्यवसायबाहेकका अन्य स्रोतबाट भएको उल्लेखनीय आम्दानीले सञ्चालन नाफामा आएको कमीलाई पूर्ति गरेको देखिन्छ।
अन्य आम्दानीतर्फ कम्पनीले उल्लेखनीय वृद्धि हासिल गरेको छ। गत वर्ष १६ लाख ४८ हजार रुपैयाँ रहेको अन्य आम्दानी यस वर्ष बढेर ३ करोड ६१ लाख ७७ हजार रुपैयाँ पुगेको छ। यही वृद्धि खुद नाफा उकालो लाग्नुको प्रमुख कारण बनेको कम्पनीको वित्तीय विवरणले देखाउँछ।
वित्तीय व्यवस्थापनमा पनि कम्पनीले सुधार गरेको छ। बैंक ऋण तथा ब्याज भुक्तानीबापतको वित्तीय खर्च ९२ लाख २७ हजार रुपैयाँबाट घटेर ५१ लाख ८ हजार रुपैयाँमा झरेको छ। यसले नाफा वृद्धिमा थप टेवा पुर्याएको छ।
दीर्घकालीन ऋणको भार पनि उल्लेख्य रूपमा घटेको छ। अघिल्लो वर्ष ४ करोड ३० लाख ११ हजार रुपैयाँ रहेको दीर्घकालीन दायित्व यस वर्ष १ करोड ५३ लाख ७७ हजार रुपैयाँमा सीमित भएको छ, जसले कम्पनीको वित्तीय आधार अझ बलियो बन्दै गएको संकेत गर्छ।
६३ करोड रुपैयाँ चुक्ता पूँजी रहेको कम्पनीको जगेडा कोष पनि बढेको छ। गत वर्ष ३ करोड १९ लाख रुपैयाँ रहेको जगेडा कोष यस वर्ष ५ करोड ८० लाख १२ हजार रुपैयाँ पुगेको छ। कम्पनीको कुल सम्पत्ति ७७ करोड १९ लाख रुपैयाँ पुगेको वित्तीय विवरणमा उल्लेख गरिएको छ।
धार्मिक पर्यटनको विस्तार, पर्यटकको निरन्तर बढ्दो आगमन, ऋणको भारमा आएको कमी तथा प्रभावकारी वित्तीय व्यवस्थापनका कारण कालिन्चोक दर्शन लिमिटेडको समग्र वित्तीय अवस्था थप सुदृढ बन्दै गएको देखिएको छ। आगामी दिनमा कालिन्चोक क्षेत्रमा पर्यटकको चाप अझ बढे कम्पनीको व्यावसायिक प्रदर्शन थप सकारात्मक हुने अपेक्षा गरिएको छ।
