नयाँदिल्ली । सन् १८१६ मा नेपाल र तत्कालीन ब्रिटिस इस्ट इन्डिया कम्पनीबीच भएको सुगौली सन्धिको सक्कल प्रति नभेटिएको विषयमा भारतले द्विपक्षीय संयन्त्रमार्फत छलफल गर्न सकिने प्रतिक्रिया दिएको छ।
भारतीय विदेश मन्त्रालयका प्रवक्ता रणधीर जयसवालले मंगलबार नियमित पत्रकार सम्मेलनमा नेपाल र भारतबीचका यस्ता विषय द्विपक्षीय संयन्त्रमार्फत छलफल गर्न सकिने बताएका हुन्।
पत्रकारहरूले नेपालका परराष्ट्रमन्त्री शिशिर खनालले मंगलबार प्रतिनिधिसभामा सुगौली सन्धिको मूल प्रति नभेटिएको जानकारी गराएको विषयमा प्रश्न गरेका थिए। जवाफमा जयसवालले नेपाल–भारत सम्बन्ध राम्रो रहेको उल्लेख गर्दै दुई देशबीच कतिपय विषयमा मतभिन्नता हुनसक्ने बताए।
‘भारत र नेपालबीचको सम्बन्ध धेरै राम्रो छ। कतिपय विषयमा सहमति नहुन सक्छ। तर, त्यस्ता मुद्दामा छलफल गर्न द्विपक्षीय संयन्त्र छ। त्यसैमार्फत कुराकानी गर्न सक्छौँ,’ उनले भने।
सन् १८१६ मा भएको सुगौली सन्धिले नेपालको पश्चिमी तथा दक्षिणी सीमासम्बन्धी महत्वपूर्ण व्यवस्था गरेको थियो। यही सन्धिलगायत ऐतिहासिक प्रमाणका आधारमा नेपालले २०७७ सालमा लिम्पियाधुरासहितको नयाँ राजनीतिक नक्सा जारी गरेको थियो। उक्त नक्सामा समेटिएको लिम्पियाधुरा, लिपुलेक र कालापानी क्षेत्रलाई भारतले आफ्नो भूभाग दाबी गर्दै आएको छ।
यसअघि सोमबार बसेको प्रतिनिधिसभा बैठकमा पनि सुगौली सन्धिको सक्कल प्रति कहाँ रहेको छ भन्ने विषयमा प्रश्न उठेको थियो। नेपाल र तत्कालीन ब्रिटिस इस्ट इन्डिया कम्पनीबीच भएको उक्त सन्धिको मूल प्रति नेपालसँग छ कि बेलायतसँग भन्ने विषयमा सांसदहरूले प्रश्न गरेका थिए। जवाफमा परराष्ट्रमन्त्री खनालले सन्धिको सक्कल प्रति फेला नपरेको बताएका थिए।
जयसवालले सोही पत्रकार सम्मेलनमा नेपालका प्रधानमन्त्री वालेन्द्र शाहलाई भारत भ्रमणका लागि गत चैत १३ गते नै निमन्त्रणा दिइसकेको पनि जानकारी दिए।
