दोलखा । दोलखाको बिगु गाउँपालिका–४, लादुकमा नेकपा (एमाले) र नेपाल कम्युनिस्ट पार्टी (नेकपा) परित्याग गरी दर्जनौँ युवाहरू नेपाली कांग्रेसमा प्रवेश गरे। बिहीबार निर्वाचन अभियानका क्रममा लादुकको गुम्बडाँडामा आयोजित एक विशेष कार्यक्रमका बीच उनीहरू कांग्रेसमा समाहित भएका हुन्। पार्टी प्रवेश गर्नेहरूमा नेकपाका प्रविन तामाङ, दिनेश नेपाली, दिपेन्द्र नेपाली तथा नेकपा एमालेका राम तामाङ, सुशान्त गिरी, कृष नेपाली, विक्रम ओली र टेकबहादुर तामाङ लगायतका युवाहरू छन्।
नवप्रवेशीहरूलाई दोलखा प्रतिनिधिसभा सदस्यका उम्मेदवार अजयबाबु शिवाकोटी र समानुपातिक उम्मेदवार छिरिङ डोल्मा शेर्पाले खादा र माला लगाएर पार्टीमा स्वागत गरे। यसअघि बुधबार मात्रै बिगु गाउँपालिकाका एमाले उपाध्यक्ष शेषनारायण श्रेष्ठसहितको ठूलो टोली कांग्रेसमा प्रवेश गरेको थियो। अजयबाबु शिवाकोटी जस्तो स्वच्छ छवि र भ्रष्टाचार विरोधी युवा उम्मेदवार चुनावी मैदानमा आएपछि बिगुमा एमाले र माओवादी परित्याग गरी कांग्रेस रोज्नेहरूको लहर चलेको स्थानीय नेताहरूले बताए।
नवप्रवेशी युवाहरूले कांग्रेसको विकासप्रतिको स्पष्ट दृष्टिकोण र लोकतन्त्र रक्षाका लागि शिवाकोटी जस्तो युवा नेतृत्वको आवश्यकता महसुस गर्दै आफूहरूले पार्टी परिवर्तन गरेको जानकारी दिए। बिगुका विभिन्न वडाहरूमा पछिल्लो समय कांग्रेस प्रवेश गर्नेहरूको सङ्ख्या दिनानुदिन बढ्दै गएको र यसले चुनावी माहोल कांग्रेसको पक्षमा बलियो बन्दै गएको दाबी गरिएको छ।
