काठमाडौं । पोर्चुगलका चर्चित फुटबलर क्रिस्टियानो रोनाल्डोले लामो समयदेखिकी प्रेमिका तथा मोडल–इन्फ्लुएन्सर जर्जिना रोड्रिग्वेजसँग विवाह गरेका छन्। उनीहरूले पोर्चुगलमा स्थानीय परम्पराअनुसार विवाह गरेको जनाइएको छ।
रोनाल्डोले सामाजिक सञ्जाल इन्स्टाग्राममा विवाहको औँठी लगाएको हात देखिने तस्वीर सार्वजनिक गरेका छन्। उक्त तस्वीरले सार्वजनिक भएको करिब ६ घण्टामै एक करोड ६८ लाखभन्दा बढी लाइक प्राप्त गरेको बताइएको छ।
पोर्चुगिज सञ्चारमाध्यमका अनुसार रोनाल्डो र जर्जिनाले ११ अगस्टमा लिस्बननजिकैको समुद्री तटीय सहर कास्काइसमा विवाह गरेका हुन्। विवाह समारोहमा उनीहरूका पाँच सन्तानसमेत सहभागी थिए।
रोनाल्डो र जर्जिना करिब एक दशकदेखि प्रेम सम्बन्धमा थिए। उनीहरूको पहिलो भेट स्पेनको म्याड्रिडस्थित गुच्चीको एक स्टोरमा भएको थियो। त्यतिबेला जर्जिना उक्त स्टोरमा कार्यरत थिइन् भने रोनाल्डो स्पेनिस क्लब रियल म्याड्रिडबाट व्यावसायिक फुटबल खेलिरहेका थिए।
गत वर्ष ११ अगस्टमै उनीहरूले इन्गेजमेन्टको घोषणा गरेका थिए। जर्जिनाले त्यतिबेला इन्गेजमेन्ट औँठीको तस्वीर सार्वजनिक गर्दै रोनाल्डोसँग यस जीवनमा मात्र नभई आफूले बाँच्ने हरेक जीवनमा समेत सँगै रहन चाहेको भाव व्यक्त गरेकी थिइन्।
रोनाल्डो र जर्जिनाको प्रेमसम्बन्ध लामो समयदेखि अन्तर्राष्ट्रिय सञ्चारमाध्यमको चर्चाको विषय बन्दै आएको थियो।
