भक्तपुर, ४ वैशाख । बागमती प्रदेशमा खेलकुदको विकास र कराँते खेलाडीहरूको क्षमता अभिवृद्धि गर्ने उद्देश्यले भक्तपुरमा 'प्रथम बागमती प्रदेश स्तरीय फुल कन्ट्याक्ट कराँते प्रतियोगिता–२०८३' आयोजना हुने भएको छ। प्रदेश फुल कन्ट्याक्ट कराँते महासंघ, बागमती प्रदेशको आयोजनामा यही वैशाख ५ र ६ गते प्रतियोगिता हुन लागेको हो।
महासंघले मंगलबार एक प्रेस विज्ञप्ति जारी गर्दै प्रतियोगिताको सम्पूर्ण तयारी पूरा भएको जानकारी दिएको छ। चाँगुनारायण नगरपालिका वडा नं. ८, मिसयाटारमा हुने यस प्रतियोगितामा प्रदेशभरिका विभिन्न जिल्ला र क्लबहरूबाट करिब ३०० उत्कृष्ट खेलाडीहरूको सहभागिता रहने महासंघका अध्यक्ष अस्मिन सिटौलाले जानकारी दिए।
अनुशासन र प्रतिस्पर्धामा जोड
प्रतियोगिताको मुख्य उद्देश्य खेलाडीहरूमा अनुशासन, आत्मविश्वास र प्रतिस्पर्धात्मक भावना जगाउनु रहेको विज्ञप्तिमा उल्लेख छ। "हामी कराँते खेलको विकास र विस्तारका लागि प्रतिबद्ध छौं," अध्यक्ष सिटौलाले भने, "यो प्रतियोगिताले प्रदेश स्तरमा लुकेर रहेका प्रतिभाहरूलाई राष्ट्रिय स्तरसम्म पुग्न मद्दत गर्नेछ।"
विजेतालाई विशेष पुरस्कार
दुई दिनसम्म चल्ने उक्त प्रतियोगितामा विभिन्न तौल र उमेर समूह अनुसार प्रतिस्पर्धा गराइनेछ। प्रतियोगिताका विजेता खेलाडीहरूलाई पदक, प्रमाणपत्र र विशेष आकर्षक पुरस्कारको व्यवस्था गरिएको आयोजकले जनाएको छ।
विशिष्ट व्यक्तित्वहरूको उपस्थिति रहने
कार्यक्रममा राष्ट्रिय तथा अन्तर्राष्ट्रिय स्तरका प्रशिक्षक, अनुभवी निर्णायक र खेलकुद क्षेत्रका विशिष्ट व्यक्तित्वहरूको उपस्थिति रहने बताइएको छ। महासंघले सम्पूर्ण खेलप्रेमी, प्रशिक्षक र अभिभावकहरूलाई उपस्थित भई खेलाडीहरूको हौसला बढाउन र कार्यक्रम सफल पारिदिन हार्दिक अनुरोध समेत गरेको छ।
प्रतियोगिता वैशाख ५ गते शनिबार बिहान ११:०० बजेबाट औपचारिक रूपमा सुरु हुनेछ।
