नेपाली बजारमा आज आइतबार सुनको मूल्यले पुनः नयाँ रेकर्ड कायम गरेको छ। पछिल्ला दिनहरूदेखि लगातार उकालो लागिरहेको सुनको मूल्य आज हालसम्मकै उच्च विन्दुमा पुगेको हो। यसअघि गत शुक्रबार पनि सुन ऐतिहासिक उच्च मूल्यमा कारोबार भएको थियो, जब प्रतितोला दुई लाख ६९ हजार तीन सय रूपैयाँमा सुन किनबेच भएको थियो। आज भने सुनको मूल्य थप बढेर प्रतितोला दुई लाख ७० हजार ६ सय रूपैयाँ पुगेको छ, जुन अघिल्लो रेकर्डभन्दा प्रतितोला एक हजार तीन सय रूपैयाँले बढी हो। सुनसँगै चाँदीको मूल्यमा पनि वृद्धि देखिएको छ।
शुक्रबार प्रतितोला चार हजार पाँच सय ६५ रूपैयाँमा कारोबार भएको चाँदी आज आइतबार चार हजार आठ सय ३५ रूपैयाँ पुगेको छ, जसअनुसार चाँदीको मूल्य अघिल्लो दिनको तुलनामा प्रतितोला दुई सय ७० रूपैयाँले बढेको हो। अन्तर्राष्ट्रिय बजारमा पनि सुनको मूल्य उच्च अवस्थामा रहेको छ, जहाँ आज सुन प्रतिऔंस चार हजार पाँच सय ३५ अमेरिकी डलरमा कारोबार भइरहेको छ।
