विराटनगर । जिल्ला प्रशासन कार्यालय मोरङले जिल्लाभर आयोजना हुने सार्वजनिक तथा निजी कार्यक्रमहरूमा डीजे (DJ) बजाउन पूर्ण प्रतिबन्ध लगाएको छ।
सहायक प्रमुख जिल्ला अधिकारी पवनराज कोइरालाद्वारा साउन १२ गते जारी गरिएको सूचनाअनुसार अर्को सूचना जारी नभएसम्म मोरङ जिल्लाभित्र कुनै पनि कार्यक्रममा डीजे प्रयोग गर्न वा गराउन पाइने छैन।
प्रशासनले मेला–महोत्सव, विवाह समारोह, पार्टी, उत्सव, चाडपर्व, धार्मिक तथा सांस्कृतिक कार्यक्रम, पुराणलगायत सबै प्रकारका सार्वजनिक तथा व्यक्तिगत कार्यक्रममा डीजे प्रयोग गर्न रोक लगाएको जनाएको छ।
सूचनाको उल्लङ्घन गर्दै डीजे प्रयोग गरेको वा गराएको पाइएमा प्रचलित कानुनअनुसार कडा कारबाही गरिने प्रशासनले चेतावनी दिएको छ।
ध्वनि प्रदूषण न्यूनीकरण, सामाजिक शान्ति, सार्वजनिक सुव्यवस्था तथा सुरक्षा कायम राख्ने उद्देश्यले उक्त निर्णय लागू गरिएको जिल्ला प्रशासन कार्यालय मोरङले जनाएको छ।
