सुर्खेत ।सुर्खेतमा केन्द्रित यो घटनाक्रममा नेपाली कम्युनिस्ट पार्टीले कर्णाली प्रदेशका पूर्वमुख्यमन्त्री तथा प्रदेशसभा सदस्य राजकुमार शर्मामाथि कारबाहीको प्रक्रिया औपचारिक रूपमा अघि बढाएको छ। जनार्दन शर्मा नेतृत्वको प्रगतिशील लोकतान्त्रिक पार्टीमा शर्मा संलग्न भएपछि उनलाई सांसद पदबाट हटाउने तयारीसहित नेकपा सक्रिय भएको हो। पार्टी संयोजक पुष्पकमल दाहाल ‘प्रचण्ड’ र सहसंयोजक माधव नेपालले शर्मालाई लिखित स्पष्टीकरण माग्दै माघ २२ गते २४ घण्टाभित्र जवाफ पेश गर्न पत्र पठाएका थिए। तर, सो समयसीमा सकिँदासम्म पनि शर्माबाट स्पष्टीकरण प्राप्त नभएको पार्टी स्रोतले जनाएको छ। पार्टी सदस्यता र संसदीय दलको सदस्यताबाट किन नहटाउने भन्ने प्रश्नसहित स्पष्टीकरण मागिएको शर्माले यसअघि तत्कालीन माओवादी केन्द्रबाट रुकुम पश्चिममा प्रदेशसभा सदस्यको निर्वाचन जितेका थिए।
२६ माघ २०८२, आईतबार ११:५१ मा प्रकाशित
