काठमाडौं । केपी शर्मा ओलीले फागुन २१ गतेका लागि निर्धारण गरिएको निर्वाचनका सन्दर्भमा अपेक्षित चुनावी माहोल अझै पूर्ण रूपमा तयार भइनसकेको प्रतिक्रिया दिएका छन्। आइतबार भरतपुर विमानस्थलमा सञ्चारकर्मीसँग संक्षिप्त कुराकानी गर्दै नेकपा (एमाले) अध्यक्ष ओलीले वर्तमान राजनीतिक परिस्थितिमा चुनावी वातावरणबारे अन्तिम निष्कर्ष निकाल्ने अवस्था नरहेको स्पष्ट पारे।
उनले ‘चुनावको वातावरणबारे सरकारले जान्ने कुरा हो । हामीले हेर्दा माहोल अझै बनेको जस्तो देखिँदैन,’ भन्दै सरकारकै तयारी र मूल्यांकनका आधारमा निर्वाचनको वातावरण स्पष्ट हुने संकेत गरे। साथै उनले ‘चुनाव हुने भयो भने हामी भाग लिन्छौं । चुनावको वातावरण यसै भन्न सकिन्न अझै पनि ।’ भन्दै आफ्नो पार्टी निर्वाचन प्रक्रियाबाट पछि नहट्ने स्पष्ट पारे।
अध्यक्ष ओलीको भनाइले निर्वाचनको मिति घोषणा भइसके पनि राजनीतिक दलहरूबीच विश्वास र तयारीको स्तरबारे अझै प्रश्न उठिरहेको संकेत गर्दछ। उनले प्रत्यक्ष रूपमा निर्वाचनप्रति असहजता व्यक्त नगरे पनि वर्तमान अवस्थालाई हेर्दा आवश्यक राजनीतिक तथा प्रशासनिक वातावरण परिपक्व नभइसकेको धारणा व्यक्त गरेका छन्।
